Tinubu ya taya kiristoci murnar Kirsimeti

Shugaban kasa, Bola Ahmed Tinubu, ya mika sakon taya murnar Kirsimeti ga mabiya addinin Kirista a Najeriya da duniya baki daya, yana mai yin kira ga zaman lafiya da kaunar juna yayin bukukuwan.

A cikin sakon da ya fitar jiya Talata, Tinubu ya bayyana Kirsimeti a matsayin lokaci na nuna hadin kai da zaman lafiya, tare da kira ga al’umma da su rungumi rayuwa mai cike da fahimtar juna.

Shugaban kasar ya ce yana taya Kiristoci murnar zagayowar ranar haihuwar Annabi Isa (AS), yana mai fatan wannan lokaci zai kara karfafa hadin kai a tsakanin ‘yan Najeriya.

Hakazalika, shugabannin majalisun dokokin kasa, Godswill Akpabio na majalisar Dattawa da Tajuddeen Abbas na majalisar Wakilai, sun fitar da sakonnin taya murnar Kirsimeti ga Kiristocin Najeriya. Sun yi fatan cewa bukukuwan za su kasance cikin lumana.