A safiyar Asabar, 28 ga Disamba, 2024, al’ummar yankin Rimin Auzinawa da ke karamar hukumar Ungogo a birnin Kano sun gudanar da zanga-zanga, inda suka rufe titin da ya tashi daga Kofar Kansakali zuwa Ring Road ga manyan motocin diban yashi.
Wannan matakin ya biyo bayan mummunan hatsarin da ya faru a ranar Juma’a, inda wata mata ta rasa ranta sakamakon takewar da wani direban Tipper yayi mata akan titin. Lamarin ya bar jama’a cikin jimami da fushi, suna mai neman dauki don kare rayuwarsu daga irin wannan hadurra.
A cewarsu, ya zama dole gwamnati ta kafa doka da za ta takaita zirga-zirgar manyan motocin diban yashi zuwa iyakar Ring Road, domin gujewa sake faruwar irin wannan tashin hankali.
A karshe, sun yi kira ga hukumomi da su gaggauta daukar mataki wajen magance matsalar da kuma kare lafiyar al’umma a yankin.
