Yan sanda sun kama matar da ake zargi da kashe mijinta

Rundunar yansanda a jihar Neja ta kama wata mata mai shekaru 27 Fatima Dzuma kan kashe mijinta mai shekaru 25, Baba Aliyu, a kauyen Lafiyagi Dzwafu da ke karamar hukumar Katcha a jihar Neja.

An ce Dzuma ta auri Baba shekaru uku da suka wuce a matsayin matar sa ta biyu bayan ta rabu da mijinta na farko, amma ba ta haihu da shi ba, yayin da matar Baba ta farko ta haihu kuma ana shirye-shiryen yin liyafar sunan yaron.

Wata majiya ta shaida wa jaridar The Nation cewa, lamarin kisan da aka aikata ya biyo bayan sabani da aka samu, inda hatta a daren da Dzuma ta kashe Baba, sun yi fada wanda Baba ya yi wa Dzuma duka.

A yayin da take bada bayani, Dzuma ta bayyana cewa, sun yi fada tsakanin su a daren, inda mijinta ya doke ta sannan ya fice daga cikin gidan bayan dukan.

“Da ya dawo kwanciya, sai na yi amfani da igiya na danne wuyan sa, inda ba zai iya kokawa ba. Na buga masa gudumma sau uku, biyu a kansa da kuma daya a hannunsa. Na yi amfani da lokacin, saboda yana yin bacci mai nauyi da ya dauke shi.”

Advertisement

“Bayanda na kashe shi, na saka shi cikin darduma, na jefa shi saman shingen gidan, sannan na ja shi zuwa daji a bayan gida, sannan na dawo don wanke jini da fitsarin da suka fito daga jikinsa lokacin da na kashe shi,” in ji ta.

Da aka tambaye ta dalilin kashe mijinta, ta ce sun yi sabani inda ta gaya masa cewa ba ta son shi, shi kuma sai ya doke ta.

Lokacin da iyalan Baba suka fara neman shi, ta ce ba ta gan shi ba, amma ta amsa laifin ne a cikin kwanaki uku bayan kisan.

A cewar ta, ita kaɗai ta aikata wannan mummunan aikin ba tare da taimakon kowa ba.

Kakakin ‘yan sanda na jihar Neja, DSP Abiodun Wasiu, ya bayyana cewa an gano gawar Baba Aliyu a cikin daji kusa da gidan, inda ya kara da cewa, an kama wadda ake zargin kuma tana hannun ‘yan sanda.