Najeriya ta nesanta kanta da zarge-zargen Nijar

Gwamnatin Najeriya ta yi martani kan zargin da maƙwabciyarta, Nijar, ta yi cewa tana taimakawa wasu ƙasashe don kawo rudani a ƙasar.

Ma’aikatar harkokin wajen Najeriya ta bayyana zargin a matsayin “zance mara tushe” wanda ya kamata a yi watsi da shi.

Ta ce wannan zargin ya haɗa da ikirarin cewa sojojin Faransa a Arewacin Najeriya suna shirin tayar da hargitsi a Nijar.

“Waɗannan zarge-zarge ne da babu wani hujja da ke tabbatar da su, kuma ya kamata a yi watsi da su gaba ɗaya,” a cewar sanarwar da ma’aikatar ta fitar ranar Asabar, kwanaki uku bayan da Nijar ta kira babban jakadan Najeriya domin nuna fushinta.

A ranar Alhamis, gwamnatin Nijar ta yi zargin cewa wasu dakarun Najeriya sun taimaka wa mayakan Lakurawa wajen kai hari kan bututun man fetur na Nijar da ke haɗa ta da ƙasar Benin.

Advertisement

Sai dai, a cikin martaninta, Najeriya ta musanta zargin, tana mai cewa: “Babu wani tallafi da maharan suka samu daga hukumomin Najeriya ko wani goyon baya daga gare su.”