Minista Idris: Tsarin haraji na Najeriya ya dade yana bukatar gyara

Gwamnatin Tarayya ta bayyana cewa tsarin haraji na Najeriya ya dade yana bukatar gyara.

Ministan Harkokin Labarai da Wayar Da Kan Jama’a, Mohammed Idris, ya bayyana hakan a lokacin taron kasa da Hukumar Kwararru ta Harkokin Sadarwa ta Najeriya (NIPR), reshen Jihar Kaduna, wanda aka gudanar a ranar Asabar a Jihar Kaduna.

Yayi magana ne akan jigon taron, “Gyaran Haraji: Rawar da Harkokin Sadarwa ke Takawa wajen Kafa Tattaunawa Mai Amfani Don Sabon Farfadowa na Tattalin Arzikin Kasa”.

Ministan ya jaddada muhimmancin harkokin sadarwa wajen hada kai tsakanin gwamnati da al’umma.

Ya yi kira ga karin amincewa daga jama’a da kuma kafa tattaunawa mai ma’ana yayin da Najeriya ke aiwatar da muhimman gyare-gyaren haraji da nufin bunkasa tattalin arziki.

Advertisement

Idris ya nuna bukatar gaggawar gyara tsarin haraji na Najeriya, inda ya bayyana cewa tsarin yana fuskantar matsaloli daga tsofaffin tsaruka da kuma rashin amincewa daga masu biyan haraji.

A duk fadin duniya, ingantaccen tsarin haraji yana da matukar muhimmanci a matsayin tushen karfin kudi ga gwamnatoci don samar da ayyukan jin kai ga ‘yan kasa.

“Amma, akwai dalilai masu yawa da ke nuna cewa tsarin gudanar da haraji na Najeriya ya dade yana bukatar gyara, sakamakon kurakuran tsari da aiwatarwa da kuma halayen masu biyan haraji game da haraji,” in ji shi.