KAROTA ta gurfanar da wasu mutum 3 a gaban kotu kan cin zarafin jami’anta

Hukumar kula da zirga-zirgar ababen hawa ta jihar Kano, wato KAROTA, ta gurfanar da wasu mutane uku da ake zargi da cin zarafin jami’anta yayin da suke gudanar da aikinsu.

An gurfanar da mutanen da suka hadar da Abubakar Mustapha, Najib Idris, da Faruq Dan Alhaji a gaban kotun Noman Islands mai lamba 47, dake Sabon Gari.

A yayin zaman kotun, alkalin ya karanto musu tuhumar da ake yi, wanda ya hada da hana jami’an gwamnati gudanar da aikinsu, wanda ya saba da sashe na 79, 171, 242, da 327 na kundin penal code.

Biyu daga cikin wadanda ake zargin, wato Abubakar Mustapha da Najib Idris, sun gurfana a kotu, inda aka tura su gidan yari har zuwa lokacin da za a kammala shari’a. Sai dai kotu ta bayar da umarnin kamo Faruq Dan Alhaji, wanda yanzu haka ya tsere.

Alkalin kotun ya yi gargadi ga jama’a da su guji aikata irin wannan abu ga jami’an tsaro. Haka zalika, ya shawarci jami’an KAROTA da su yi aiki da kwarewa da ladabi yayin da suke gudanar da ayyukansu, kamar yadda dokokin hukumar suka tanada.

Advertisement

A nasa bangaren, shugaban hukumar KAROTA, Hon. Faisal Mahmud Kabir, ya nuna jin dadinsa da yadda shari’ar ta gudana. Ya kuma yi kira ga jama’a da su guji daukar doka a hannunsu idan sun samu sabani da jami’an hukumar.