Ivory Coast ta umarci Faransa ta janye sojin ta daga kasar

Shugaban ƙasar Ivory Coast, Alassane Ouattara, ya sanar da cewa sojojin Faransa za su fara ficewa daga ƙasar nan ba da jimawa ba, a cikin jawabinsa na Sabuwar Shekara.

Yace “Mun yanke shawarar janye sojojin Faransa cikin tsari da daidaituwa,” in ji Ouattara a cikin jawabin da aka yada ta talabijin.

Shugaban ya bayyana cewa za a fara janye sojojin a watan Janairu, tare da ambaton shirin zamani na rundunar sojojin ƙasar Ivory Coast.

Shugaban ya ce wurin da rundunar sojojin ruwan Faransa ke zama a Port Bouet za a miƙa shi ga rundunar sojojin ƙasar Ivory Coast.

A halin yanzu, akwai kusan sojojin Faransa 600 da ke ƙasar Ivory Coast.

Advertisement

Wasu ƙasashen yammacin Afirka da suka haɗa da Mali, Burkina Faso, da Nijar, sun bukaci faransa ta janye sojojinta.

Faransa ta ci gaba da kasancewa da sansanonin soja a ƙasashen yankin, duk da cewa tuni aka kawo ƙarshen mulkin mallaka, musamman wajen yaƙi da masu tayar da kayar baya na sunan addini.

Idan har sojojin Faransa suka bar Ivory Coast, yanzu sun rage ne kawai a Gabon da Djibouti da ke yankin kahon Afirka.