IITA, YAS sun ba matasan Kano 400 tallafin noma

Shirin Matasa a Harkar Noma (YAS) na Hukumar Binciken Harkokin Noma ta Duniya (IITA) ya bai wa sama da matasa manoma 400 kayayyakin noma daban-daban a Jihar Kano.

Kayayyaki an bada su ne a matsayin tallafi ga mahalarta shirin, wadanda auka samu horo kan yadda zasu samar da kayan amfanin noma daban-daban, ciki har da kiwon kaji, kayan lambu, da kiwon kifi, tare da tallafin kudi daga Ofishin Jakadancin Masarautar Netherlands a Najeriya.

Yayin raba kayayyakin a ofishin IITA da ke Kano a karshen mako, Ko’odinetan Shirin, Mista Adebayo Awotodunbo, ya bayyana cewa wannan tallafi zai taimaka wajen kara yawan amfanin gona da kuma rage dogaro da sbigo da wasu nau’in kayayyaki daga kasashen waje.

A cewarsa, kayayyakin da aka raba sun hada da buhunan abincin kaji, injunan feshi, buhunan taki, injunan shuka, buhunan abincin kifi, tray na dashe, irin attarugu da tumatir, da sauransu.

Ya kara da cewa shirin ya fara ne da horarwa kan fasaha da kasuwanci, sannan aka bai wa wadanda suka halarci horon tallafin da zai ba su damar fara kasuwancin noma mai riba ko fadada kasuwancin da suka riga suka fara.

Advertisement

Awotodunbo, wanda ya wakilci Shugabar Kungiyar YAS, Ms. Aline Mugisho, ya ce: “Dalilin wannan tallafi shi ne bunkasa kwarewar matasa manoma don su iya kara yawan amfanin da auke samu, tare da jawo hankalin karin matasa su rungumi noma.

Ya jaddada muhimmancin karfafa matasa a harkar noma, yana mai cewa irin wadannan shirye-shirye suna taimakawa wajen rage rashin aikin yi da kuma bunkasa tattalin arzikin kasa. Awotodunbo ya kuma bukaci wadanda suka ci gajiyar tallafin da su yi amfani da horon da aka ba su domin cigaban kansu

Shirin Matasa a Harkar Noma (YAS) wani bangare ne na kokarin IITA don karfafa matasa su rungumi noma ta hanyar amfani da dabaru na zamani. Tare da tallafin kudade daga ofishin Jakadancin Netherlands a Najeriya.