Gwamnatin Ganduje ce ta haddasa yaduwar cutar Diphtheria a Kano – Kwamishinan Lafiya

Kwamishinan Lafiya na Jihar Kano, Abubakar Labaran Yusuf, ya dora alhakin yaduwar cutar Diphtheria a jihar kan gwamnatin tsohon gwamna Abdullahi Umar Ganduje.

A cewar kwamishinan, gwamnatin Ganduje ta kasa gudanar da shirin rigakafin kananan yara na tsawon wata 18, wanda hakan ya jefa jihar cikin matsalar yaduwar cutar.

Ya bayyana cewa kaso 80 cikin 100 na masu cutar Diphtheria a Najeriya sun fito ne daga Kano.

Kwamishinan ya yi wannan jawabi a ranar Litinin yayin da Gwamnan Kano, Abba Kabir Yusuf, ya kaddamar da sabon shirin kula da lafiyar mata da kananan yara a karamar hukumar Kumbotso.

Labaran ya ce sabon shirin zai maida hankali kan rigakafin yara da kuma kara wayar da kai kan muhimmancin kiwon lafiyar yara don kaucewa sake fuskantar irin wannan annoba a nan gaba.

Advertisement