An kama masu shirya bikin nishadin yara a makarantar Islamic High School, Basorun, Ibadan, babban birnin Jihar Oyo, bayan mummunar turereniya da aka yi wanda ya yi sanadin rasa rayuka da jikkata wasu da dama a ranar Laraba.
Gwamnan jihar, Seyi Makinde, ya tabbatar da kama masu shirya taron yayin da ake ci gaba da bincike kan musabbabin faruwar lamarin.
A cikin wata sanarwa da ya wallafa a shafinsa na X a ranar Laraba, Makinde ya bayyana cewa an dauki matakan da suka dace domin hana afkuwar hakan, tare da mika ta’aziyyarsa ga iyalan wadanda lamarin ya shafa.
A cewarsa, “A safiyar yau, wani mummunan lamari ya faru a makarantar Islamic High School, Basorun, wurin da aka shirya wani taro na iyalai. Abin bakin ciki, turereniya a wurin ya yi sanadin rasa rayuka da kuma jikkata wasu. Wannan rana ce ta bakin ciki a gare mu a nan Jihar Oyo. Muna mika ta’aziyyarmu ga iyayen da farin cikinsu ya koma bakin ciki saboda wannan mummunan lamari.
“Mun dauki matakan tabbatar da cewa ba za a samu karin mace mace ba ta hanyar tura jami’an tsaro domin dawo da zaman lafiya a wurin. Haka nan mun tura jami’an lafiya da motocin daukar marasa lafiya zuwa wurin. An dakatar da taron, kuma an fitar da duk mahalarta daga wurin. Muna daukar dukkan matakan da suka dace domin tabbatar da tsaron wurin.
“Yayin da ake ci gaba da bincike, an kama masu shirya taron da ya yi sanadin wannan turereniya.”
Gwamnan ya kuma ba da tabbacin cewa duk wanda aka samu da laifi zai fuskanci hukunci.
Share your story or advertise with us: Whatsapp: +2347068606071 Email: info@newspotng.com
