NNPCL ya karɓo bashin $1b don tallafawa matatar Dangote

Kamfanin man Fetur na kasa (NNPCL) ya tabbatar da karɓo bashin dala biliyan ɗaya domin tallafawa aikin matatar dangote, bayan da ta fuskanci matsalolin kuɗi.

Babban jami’in hulɗa da jama’a na NNPCL, Olufemi Soneye, ya bayyana hakan yayin wani taron masu ruwa da tsaki kan makamashi da aka gudanar a Abuja.

“Mun yi dabarar karɓo bashin dala biliyan ɗaya wanda aka tallafa wa aikin matatar dangote don shawo kan matsalolin kuɗin da aka fuskanta,” in ji Soneye.

Ya bayyana cewa wannan matakin ya ba da damar tabbatar da dorewar matatar mai ta farko mallakar ‘yan kasuwa a Najeriya, wanda ke nuni da kokarin da kamfanin NNPCL yake wajen tallafawa haɗin gwiwar gwamnati da masu zaman kansu don ci gaban tattalin arziki.

Soneye ya jaddada cewa ana sa ran Matatar Dangote za ta taka muhimmiyar rawa wajen rage dogaro da shigo da man fetur daga ƙasashen waje.

Advertisement

A cewarsa, matatar za ta ƙara yawan man fetur da ake tacewa a cikin gida, tare da bayar da gudummawa ga bunƙasar tattalin arzikin ƙasa.